മൂന്നാര്: ഇടുക്കി രാജമലയില് ഓടുന്ന ജീപ്പില്നിന്നും കുഞ്ഞ് തെറിച്ചുവീണ സംഭവത്തില് മാതാപിതാക്കള്ക്കെതിരെ പോലീസ് കേസെടുത്തു. അശ്രദ്ധമായി കുഞ്ഞിനെ കൈകാര്യം ചെയ്തതിന് ജുവൈനല് ജസ്റ്റിസ് നിയമപ്രകാരം ജാമ്യമില്ലാ വകുപ്പുകള് ചുമത്തിയാണ് മൂന്നാര് പോലീസ് കേസ് രജിസ്റ്റര് ചെയ്തത്.
കുഞ്ഞിന്റെ സുരക്ഷ ഉറപ്പാക്കേണ്ട ബാധ്യത മാതാപിതാക്കള്ക്കുണ്ടായിരുന്നു. എന്നാല് ഇക്കാര്യത്തില് മാതാപിതാക്കള് വീഴ്ച വരുത്തിയെന്നാണ് പോലീസിന്റെ കണ്ടെത്തല്.
ജാമ്യമില്ലാ വകുപ്പ് പ്രകാരമാണ് കേസെടുത്തതെങ്കിലും പോലീസ് തിടുക്കത്തില് നടപടി സ്വീകരിച്ചേക്കില്ലെന്നാണ് വിവരം. സംഭവത്തിന്റെ എല്ലാവശങ്ങളും പരിശോധിച്ചശേഷം മാത്രമേ തുടര്നടപടികള് സ്വീകരിക്കുകയുള്ളു.
കുഞ്ഞിന്റെ അമ്മ ചില മരുന്നുകള് കഴിച്ചിരുന്നതായും അതിനാല് ഉറങ്ങിപ്പോയെന്നുമാണ് മാതാപിതാക്കള് പോലീസിന് നല്കിയ മൊഴി.
ഇക്കാര്യവും പോലീസ് പരിശോധിക്കുന്നുണ്ട്. സംഭവത്തില് സംസ്ഥാന ബാലാവകാശ കമ്മീഷന് ജില്ലാ കളക്ടറോടും പോലീസ് മേധാവിയോടും റിപ്പോര്ട്ട് തേടിയിരുന്നു.
Comments