ഡിട്രോയിറ്റ്: മോഡേണ കോവിഡ്-19 വാക്സിന്റെ ആദ്യ കുത്തിവെപ്പ് ഡിട്രോയിറ്റ് ഹെന്റിഫോര്ഡ് ആശുപത്രിയില് ആഷ്ലി വില്സണ് എന്ന ഇരുപത്തിനാലുകാരിക്ക് നല്കി. മോഡേണ നിര്മ്മിക്കുന്ന കോവിഡ്-19 വാക്സിന്റെ മൂന്നാംഘട്ട പരീക്ഷണാര്ത്ഥം ആദ്യ 20 രോഗികള്ക്ക് കുത്തിവെയ്പ്പ് നല്കുന്നതിന്റെ ഭാഗമായിട്ടാണ് ആഷ്ലി വില്സണ് എന്ന റിസര്ച്ച് അസിസ്റ്റന്റ് കുത്തിവെയ്പ്പ് സ്വീകരിച്ചു ചരിത്രത്തില് സ്ഥാനം പിടിച്ചത്.
ലോകമെമ്പാടും മഹാമാരിയായി പടര്ന്ന് 18.8 മില്യണ് ആളുകള്ക്ക് രോഗം പടരുകയും 706,000 ആളുകള് മരണപ്പെടുകയും ചെയ്ത കൊറോണ വൈറസിന്റെ പ്രതിരോധ വാക്സിന് നിര്മ്മാണം മൂന്നാംഘട്ടത്തില് എത്തി നില്ക്കുന്നു. 2021-ന്റെ തുടക്കത്തോടെ ഏകദേശം 500 മില്യണ് ആളുകള്ക്ക് മരുന്ന് ലഭ്യമാക്കാന് സാധിക്കുമെന്നാണ് നിര്മ്മാതാക്കളായ മോഡേണ കമ്പനി നല്കുന്ന വിവരം. അമേരിക്കയിലെ 89 ആശുപത്രികളില് കോവിഡ്-19 വാക്സിന് പരീക്ഷിക്കുന്നതിന്റെ ഭാഗമായിട്ടാണ് മിഷിഗണില് ഹെന്റി ഫോര്ഡ് ആശുപത്രിയില് തിരഞ്ഞെടുക്കപ്പെട്ടവര്ക്കു പരീക്ഷണാര്ത്ഥം കുത്തിവയ്പ് നല്കിയത്.
അമേരിക്കയിലുടനീളം 30,000 ആളുകളെ കണ്ടെത്തി മരുന്ന് പരീക്ഷിക്കാനാണ് ഉദ്ദേശിക്കുന്നത്. കോവിഡ്-19 രോഗംമൂലം കൂടുതല് അപകടസാധ്യത ഉള്ളവര്ക്കും 65 വയസ്സിന് മുകളിലുള്ളവര്ക്കും ആരോഗ്യമേഖലയില് പ്രവര്ത്തിക്കുന്നവര്ക്കും മുന്ഗണന നല്കും. മോഡേണ കോവിഡ്-19 വാക്സിന് വളരെ സുരക്ഷിതവും രോഗപ്രതിരോധനത്തിന് സഹായകരവുമായ മികച്ചരീതിയിലാണ് നിര്മ്മിച്ചിരിക്കുന്നത് എന്ന് അധികൃതര് അറിയിച്ചു. ഇരുന്നൂറോളം കോവിഡ്-19 വാക്സിനുകള് നിര്മ്മാണത്തിന്റെ വിവിധ ഘട്ടങ്ങളിലാണ്. എന്നാല് ഇതില് 7 വാക്സിനുകള് വളരെ വേഗത്തില് ലഭ്യമാക്കാന് കഴിയുമെന്ന് അമെരിക്കന് ഫുഡ് ആന്ഡ് ഡ്രഗ് അഡ്മിനിസ്ട്രേഷന് അറിയിച്ചു.
Comments