തിരുവല്ല :  ഫോമയുടെ സ്ഥാപക നേതാക്കളിലൊരാളും 2019ലെ ഫോമയുടെ കേരള കൺവെൻഷൻ ചെയർമാനുമായ സജി അബ്രഹാമിൻറെ മകൻ ഷോൺ എസ് ഏബ്രഹാം (21) അന്തരിച്ചു. ന്യൂയോർക്കിലെ എൽമണ്ടിൽ സ്ഥിരതാമസക്കാരായ സജിയും കുടുംബവും കടപ്ര വളഞ്ഞവട്ടം വലിയ പറമ്പിൽ തൈക്കടവിൽ കുടുംബാംഗമാണ്. കോമേഴ്സ് വിഭാഗം മൂന്നാം വർഷ വിദ്യാർത്ഥിയായിരുന്നു. ഇന്ത്യൻ സമയം ഞായറാഴ്ച ഉച്ചയ്ക്ക് ഒന്നരയോടെ ആയിരുന്നു മരണം സംഭവിച്ചത്. നാല് ദിവസം മുമ്പാണ് ഷോണിന് രോഗബാധ സ്ഥിരീകരിച്ചത്.  മല്ലപ്പള്ളി നെടുങ്ങാടപ്പള്ളി വടക്കേക്കര വീട്ടിൽ സോളി ഏബ്രഹാമാണ് മാതാവ്. സ്നേഹ, ഷാന എന്നിവർ സഹോദരിമാരാണ്. കഴിഞ്ഞ 25 വർഷക്കാലത്തോളമായി ഷോണിന്റെ കുടുംബം അമേരിക്കയിൽ സ്ഥിര താമസമാണ്. സംസ്കാരം ന്യൂയോർക്കിൽ നടക്കും.