കോഴിക്കോട്: കോണ്ഗ്രസ് അധ്യക്ഷന് രാഹുല്ഗാന്ധി വയനാട്ടില് മത്സരിച്ചേക്കുമെന്ന സൂചനകള് പുറത്തുവന്നതോടെ വയനാട് മണ്ഡലം ദേശീയരാഷ്ട്രീയത്തില് ശ്രദ്ധേയമാകുന്നു. അമേഠിക്ക് പുറമേ ദക്ഷിണേന്ത്യയിലും രാഹുല് ഗാന്ധി മത്സരിക്കണമെന്ന ആവശ്യം ഉയര്ന്നതോടെയാണ് അത് വയനാട് മണ്ഡലത്തില് മതിയെന്ന് കോണ്ഗ്രസ് ഹൈക്കമാന്ഡ് തീരുമാനമെടുത്തത്. ദക്ഷിണേന്ത്യയില് കോണ്ഗ്രസിന്റെ ഏറ്റവും സുരക്ഷിതമായ മണ്ഡലം എന്നതുതന്നെയായിരുന്നു അതിനുകാരണം.
രാഹുല്ഗാന്ധി വയനാട്ടില് മത്സരിച്ചാല് ദക്ഷിണേന്ത്യയിലാകെ കോണ്ഗ്രസ് തരംഗം സൃഷ്ടിക്കാന് കഴിയുമെന്നാണ് പാര്ട്ടിയുടെ പ്രതീക്ഷ. ഇതോടൊപ്പം കോണ്ഗ്രസ് 16 സീറ്റുകള് പ്രതീക്ഷിക്കുന്ന കേരളത്തിലും സമ്പൂര്ണവിജയം നേടാമെന്നും കോണ്ഗ്രസ് കണക്കുകൂട്ടുന്നു.
കോണ്ഗ്രസ് അധ്യക്ഷന് രാഹുല്ഗാന്ധി വയനാട്ടില് മത്സരിക്കണമെന്ന് കെ.പി.സി.സി. അദ്ദേഹത്തോട് ആവശ്യപ്പെട്ടതായി എ.ഐ.സി.സി. ജനറല് സെക്രട്ടറി ഉമ്മന്ചാണ്ടിയാണ് മാധ്യമങ്ങളോട് വെളിപ്പെടുത്തിയത്. രാഹുലിനോട് കാര്യങ്ങള് വിശദീകരിച്ചിട്ടുണ്ടെന്നും അദ്ദേഹത്തിന്റെ മറുപടിക്കായി കാത്തിരിക്കുകയാണെന്നും ഉമ്മന്ചാണ്ടി പറഞ്ഞിരുന്നു. ഇതിനിടെ രാഹുല്ഗാന്ധി മത്സരിക്കാന് തയ്യാറായാല് വയനാട്ടില്നിന്ന് പിന്മാറുമെന്നും രാഹുല്ഗാന്ധിയുടെ പ്രചാരണചുമതല ഏറ്റെടുക്കുമെന്നും ടി. സിദ്ദീഖ് പ്രതികരിച്ചു.
വയനാട് ലോക്സഭാ മണ്ഡലത്തില് നിന്ന് രാഹുല്ഗാന്ധി മത്സരിക്കുമെന്ന വാര്ത്തകള്ക്ക് പിന്നാലെ രാഹുലിനെ സ്വാഗതം ചെയ്ത് കേരളത്തിലെ നേതാക്കള്.
ഒരു പ്രധാനമന്ത്രിയെ സംഭാവന ചെയ്യാന് കഴിയുകയെന്നത് കേരളത്തിന് അപൂര്വമായി വരുന്ന ഭാഗ്യമാണ്. എല്ലാവിധ ജാതിമത വിഭാഗങ്ങളും ആദിവാസികളുമുള്ള പ്രദേശമാണ് വയനാട്. ഇങ്ങനെയൊരു തീരുമാനം കോണ്ഗ്രസ് എടുക്കുകയാണെങ്കില് മുസ്ലീംലീഗ് ആ തീരുമാനത്തെ സ്വാഗതം ചെയ്യുന്നതായും പി.കെ.കുഞ്ഞാലിക്കുട്ടി വ്യക്തമാക്കി.
Comments