അബുദാബി: യു.എ.ഇ.യില് ആദ്യമായി നിര്മിക്കുന്ന ഹിന്ദുക്ഷേത്രത്തിന് പ്രധാനമന്ത്രി നരേന്ദ്ര മോദി തറക്കല്ലിട്ടു. ദുബായ് ഒപ്പേരയില് നടന്ന ചടങ്ങില് വീഡിയോ കോണ്ഫറന്സ് വഴിയാണ് ക്ഷേത്രത്തിന്റെ ശിലാസ്ഥാപന കര്മ്മം നിര്വ്വഹിച്ചത്. തുടര്ന്ന് ഇന്ത്യന് സമൂഹവുമായി സംവദിച്ചു. ഇന്ത്യ മാറി കൊണ്ടിരിക്കുകയാണ്. ദരിദ്രജനങ്ങള് പോലും നോട്ട് നിരോധനം ശരിയായ നീക്കമാണെന്ന് പറയുന്നു. ജി.എസ്.ടിയും ശരിയാണെന്ന് ഏഴ് വര്ഷത്തിന് ശേഷം തിരിച്ചറിയുമെന്നും മോദി പ്രസംഗത്തിനിടെ പറഞ്ഞു. നിങ്ങള് ഇവിടെ കാണുന്ന ഓരോ സ്വപ്നവും ഇന്ത്യയില് നടപ്പാക്കുമെന്ന് ഞാന് നിങ്ങള്ക്ക് ഉറപ്പ് നല്കുന്നുവെന്നും മോദി പറഞ്ഞു.
ഗള്ഫ് രാജ്യങ്ങളുമായി ഇന്ത്യക്ക് ശക്തമായ ബന്ധമാണുള്ളത്. മുപ്പത് ലക്ഷം ഇന്ത്യക്കാരെ അവരുടെ നാടായി ഗള്ഫ് രാജ്യങ്ങള് സംരക്ഷിക്കുന്നതിന് ഞാന് നന്ദി പറയുന്നു. ഗള്ഫ് രാജ്യങ്ങളുമായുള്ള ബന്ധത്തിന്റെ അടിസ്ഥാനം വെറും കച്ചവടം മാത്രമല്ല. യഥാര്ത്ഥ പങ്കാളിത്തം കൂടിയാണെന്നും കല്ലിടല് കര്മ്മത്തിന് ശേഷം ഇന്ത്യന് സമൂഹത്തെ അഭിസംബോധന ചെയ്തുകൊണ്ട് മോദി പറഞ്ഞു.
Comments