തേ തു തീവ്രേണ തപസാ
പ്രത്യക്ഷീകൃത്യ വേധസം
നിര്ദ്ദേവത്വേച്ഛയാത് നിദ്രാം
കുംഭകര്ണോവൃണീത -
ഒരര്ഥത്തില് നമ്മളെല്ലാവരും
കുംഭകര്ണ്ണരാണെന്നുചൊല്ലാം
ടിയാനു പറ്റീതബദ്ധമാവാം ...
നമ്മുടേതല്പം വികൃതം , അല്ലേ ??
നാവില് സരസ്വതി പാളിയപ്പോള്
'നിര്ദ്ദേ' യെന്നുള്ളതു 'നിദ്ര' യായി
ബ്രഹ്മാവുമില്ല ... .തപസ്സുമില്ല
നമ്മള്ക്കബദ്ധം പിണഞ്ഞതൂല്യ !
പാവം അദ്ധ്യാപകന് ഘോരഘോരം
ലെക്ച്ചറടിക്കും സമയമെല്ലാം
കണ്ണുതുറന്നു മയങ്ങിടുന്ന
നമ്മള് ചെയ്യുന്നതബദ്ധമാണോ ?
പഞ്ചാരടിക്കുവാനായിമാത്രം
മീറ്റിംഗിനെത്തും പഹയരെല്ലാം
ഗൌരവമേറിയ ചര്ച്ചനേരം
ഇടത്തോട്ടുനോക്കിയിരുന്നിടുന്നു !!!
ആഫീസിലൊറ്റ മുറിയിലായാല്
പി. ഏ. ടെ 'സൊള്ളല്' കഴിഞ്ഞിടുമ്പോള്
ആരാരുമില്ലാത്ത വേളകളില്
ഒന്നുമയങ്ങിയാല് കുറ്റമായോ ??
കാണുവാന് ആള് വരുന്നുവെന്ന്
പി . എ . പറഞ്ഞാലെടുത്തിടുന്ന
കൂറ്റന് ഫയലുകള് കൈയ്യിലേറ്റി
ഗൌരവത്തോടെ കുനിഞ്ഞിരിക്കും !
ഊണുകഴിഞ്ഞ ഒരു മണിക്കൂര്
ആരും വരില്ലയെന് റൂമിലേക്ക്
വന്നാലവന്റെ കഥകഴിക്കും ;
നീയെന്നെയാര് ഉണര്ത്തിടുവാന് ?
റിട്ടയര്ചെയ്തതും നേരംപോകാന്
നിദ്രയെത്തന്നെ പിടിച്ചു ' കൂട്ട് ' !
ഊണിനും കാപ്പിക്കും മാത്രമായി
കൊച്ചിടവേള ഉണര്ന്നിരുന്നു .
രാത്രി ഉറങ്ങുവാന് പറ്റണില്ല
സ്റ്റോക്കുമുഴുവനും തീര്ന്നപോലെ .
മിണ്ടുവാനാളില്ല , ചെയ്യുവാനും :
മൌനത്തിനെന്തു മുഴക്കമെന്നോ ....
ഉറങ്ങാതെ കൂര്ക്കംവലിച്ചിടുന്ന
കോന്തന്റെ കൂടെ .. തനിക്കുവയ്യ :
എല്ലാര്ക്കുമുണ്ട് ; തനിക്കും വേണം
സ്വന്തംമുറി എന്നുചൊല്ലി ഭാര്യ ! .
ഉറക്ക മുണര്വുകള് വേറിടാതെ
(നിദ്രായുണര്ച്ചകള് വേറിടാതെ )
എപ്പോഴും മങ്ങിയ കണ്കളുമായ്
പാവപോല് മെല്ലെ ചലിച്ചിടുന്നീ
വൃദ്ധനെ സ്ഥിരമായുറക്കിയാലോ ...
കവിതയെഴുത്തും കഥയെഴുത്തും
ആര്ക്കുമേ വേണ്ടാത്ത ' സാധനങ്ങള് '
പിന്നെയും പിന്നെയും സൃഷ്ടി തന്നെ ;
വായിക്കാനാളുകള് വാടകക്കും !
മൂന്നിനും നാലിനും ഇടയിലായി
കുത്തിക്കുറിച്ച , യീ , അക്ഷരങ്ങള്
ഒന്നൂടെ നോക്കാന് മെനക്കെടാതെ
മാലിന്യമെന്നപോല് തള്ളിടുന്നു .
C. S. Sankara Warrier , Anubhuti 680306
Comments